Por povi bone kompreni la bazan gramatikon de Esperanto necesas koni kelkajn terminojn. Malsupre troveblas listo de ili kun mallongaj klarigoj. (La klarigoj en tiu ĉi paĝo ne estas kompletaj, ili nur celas doni malpezan enkondukon al la terminoj.)

Substantivo (Substantivo)

Substantivo estas nomo de aĵoj aŭ aferoj. Substantivo respondas al la demando "Kio ĝi (ŝi, li) estas?". Ekzemple: "homo", "ideo", "nomo" kaj "domo". »

Pluralo (Pluralo)

Pluralo signas ke temas pri pli ol unu afero. Ekzemple: "homoj", "ideoj", "belaj", "bonaj", "tiuj". »

Adjektivo (Adjektivo)

Adjektivo priskribas substantivon. Adjektivo respondas al la demando "Kia ĝi (ŝi, li ktp.) estas?" Ekzemple: "bela", "bona", "longa" kaj "granda". »

Verbo (Verbo)

Verbo prezentas agon aŭ staton. Verboj respondas al la demandoj "kion fari?", "kio okazas?", "kion vi (li, ŝi ktp.) faras?" Ekzemple: "kanti", "staras" kaj "estis". »

Adverbo (Adverbo)

Adverboj priskribas verbon, adjektivon, adverbon aŭ tutan frazon. Ekzemploj de adverboj: "bele", "longe" kaj "hieraŭ". »

Prepozicio (Prepozicio)

Prepozicio estas vorteto kiu montras la frazrolon de la posta frazparto. Ekzemple: "sur", "en" kaj "sub". »

Pronomo (Pronomo)

Pronomoj estas la vortoj: mi, vi, ŝi, li, ĝi, ni, ili, oni, si. »

Afikso, Prefikso, Sufikso (Afikso, Prefikso, Sufikso)

Afikso estas uzata por fari kunmetitajn vortojn. Afiksoj, kiujn oni metas post aliaj radikoj, nomiĝas sufiksoj. Afiksoj, kiujn oni metas antaŭ aliaj radikoj, nomiĝas prefiksoj. »

Subjekto (Subjekto)

Subjekto estas ĉefa vorto de la frazo, kiu estas gramatike sendependa de aliaj frazpartoj. Plejofte (sed ne ĉiam) subjekto estas tio, kio faras la agon en frazo. Ekzemple en la frazo "Mi amas vin." "mi" estas la subjekto. »

Objekto (Objekto)

Objekto estas tio kio estas rekte trafata de la ago en la frazo. Ekzemple en la frazo "Mi amas vin." "vin" estas la objekto. »